ఇందూరు ధన్యవాద్ సభకు ఏర్పాట్లు పూర్తి
నిజామాబాద్, వెలుగు: నిజామాబాద్ కు మంగళవారం ప్రధాని మోదీ రానుండగా.. బీజేపీ లీడర్లు భారీ ఏర్పాట్లు చేస్తున్నారు. తెలంగాణలో రూ.6 వేల కోట్లతో ఎన్టీపీసీ నిర్మించిన 800 మెగావాట్ల విద్యుత్తు ప్రాజెక్టును ఇందూర్ వేదికగా మోదీ జాతికి అంకితం చేస్తారు. అనంతరం గవర్నమెంటు ప్రభుత్వ గిరిరాజ్ కాలేజీ మైదానంలో భారీ సభ లో ప్రసంగిస్తారు. వర్షం కురిసినా ఇబ్బందిలేకుండా రెండు లక్షల మంది కూర్చునేలా టెంట్లు వేస్తున్నారు.
నాలుగు భారీ టెంట్లు వేసే పనిలో నిపుణులైన గుజరాజ్, పశ్చిమ బెంగాల్, మధ్యప్రదేశ్ రాష్ట్రాల నుంచి వచ్చిన వందలాది లేబర్లు పనిచేస్తున్నారు. మైదానం మొత్తాన్ని మొరం మట్టితో చదును చేసి కంకర మిక్స్తో తాత్కాలిక రోడ్లు వేస్తున్నారు. భారీ లైట్లు, ఆధునీక సౌండ్ సిస్టం అమర్చుతున్నారు. కరెంటు సమస్య లేకుండా ముందు జాగ్రత్తగా జనరేటర్లు అందుబాటులో పెట్టారు.
అంతా ఎస్పీజీ కనుసన్నల్లో
ప్రధాని మోదీ భద్రతను పర్యవేక్షించే ఎస్పీజీ పోలీసుల కనుసన్నల్లో మొత్తం ఏర్పాట్లను జిల్లా యంత్రాంగం చేయిస్తోంది. దిల్లీ నుంచి వచ్చిన ఐజీ స్థాయి ఐపీఎస్ అధికారి ఇక్కడే ఉండి ఏర్పాట్లు పర్యవేక్షిస్తున్నారు. సభా మైదానం మొత్తాన్ని ఇంచించు మెటల్ డిటెక్టర్లతో తనిఖీ చేయిస్తున్నారు. సోమవారం రాత్రికి పనులన్నీ ముగించేలా ప్లాన్ వేసి అందుకనుగుణంగా ఏర్పాట్లు చేస్తున్నారు. ఎస్పీజీకి సహకారం అందించడానికి జిల్లా పోలీసులు గ్రౌండ్లో మరో టెంటు వేసుకొని అందుబాటులో ఉన్నారు. రాష్ట్ర డీజీపీ అంజనీకుమార్ యాదవ్ ఇక్కడి సమాచారాన్ని ఎప్పటికప్పడు తెలుసుకుంటూ మార్గనిర్దేశం చేస్తున్నారు. ఐజీ చంద్రశేఖర్రెడ్డి ఇక్కడే ఉండి పనులు చూస్తున్నారు.
ధన్యవాద్ సభ
సభకు మొదట ఇందూరు జనగర్జన పేరు పెట్టారు. పాలమూరు వేదికగా రాష్ట్రానికి ప్రధాని మోదీ జాతీయ పసుపు బోర్డు ఏర్పాటు చేస్తున్నట్టు ప్రకటించడంతో సభను ధన్యవాద్ సభగా మార్చారు. రైతులు అధిక సంఖ్యలో వచ్చి బోర్డు ఇస్తున్న ప్రధానికి కృతజ్ఞతలు తెలుపాలని ఎంపీ అర్వింద్ పిలుపునిచ్చారు.
నిఘా నీడలో గ్రౌండ్
సోమవారం గ్రౌండ్ మొత్తం ఎస్పీజీ కంట్రోల్లోకి వెళ్లనుంది. వారి ఆధీనంలోకి వెళ్లాక వ్యక్తుల రాకపోకలపై నిఘా ఉంటుంది. మధ్యాహ్నం 3 గంటలకు కొత్త కలెక్టరేట్లోని హెలిపాడ్లో హెలికాఫ్టర్ ల్యాండ్ అయ్యాక ప్రత్యేక మార్గంలో ప్రధాని మోదీ సభా ప్రాంగణానికి ఐదు నిమిషాల్లో చేరుకుంటారు. మొత్తం 8 వేల మంది పోలీసులను ఆయన బందోబస్తు కోసం నియమించనున్నారు.
ప్రధానికి చేరువలో ఉండే వ్యక్తులకు ప్రత్యేక పాస్లు ఎస్పీజీ సిఫారసు మేరకు జిల్లా పోలీసులు జారీ చేయనున్నారు. సభా వేదిక దగ్గర్లో దూరదర్శన్ మినహా ఇతర మీడియా ఛానళ్లు వీడియోలు తీయొద్దని ఇప్పటికే ఆదేశాలు జారీ చేశారు. నిజామాబాద్ వచ్చాక ప్రధాని మోదీ 2 గంటలు ఉండనున్నారు. ఎంపీ అర్వింద్ ఆధ్వర్యంలో బీజేపీ స్టేట్ ప్రెసిడెంట్ జి.కిషన్రెడ్డి, ఈటల రాజేందర్ ఏర్పాట్లను ఇప్పటికే పరిశీలించి వెళ్లారు.
